Դեֆիբրիլյատորով հագեցած անօդաչու սարքը կարող է զգալիորեն մեծացնել սրտի կանգի ժամանակ ողջ մնալու հավանականությունը:
Ամեն տարի սրտի կանգի պատճառով մահանում է ավելի քան վեց միլիոն մարդ: Տասը մարդուց միայն մեկն է ողջ մնում սրտի կանգի դեպքում հիվանդանոցից դուրս, և ժամանակը մեծ նշանակություն ունի հիվանդի կյանքը փրկելու համար: Շվեդիայում գտնվող Կարոլինյան ինստիտուտի մասնագետների կողմից անցկացված նոր հետազոտության համաձայն, խնդրի լուծումներից կարող է հանդիսանալ անօդաչու թռչող սարքերի օգտագործումը:
Մասնագետների խումբն անցկացրել է հետազոտությունը` ելնելով Շվեդիայում տիրող իրավիճակից: Նրանք մեծ ուշադրություն են հատկացրել Ստոկհոլմի այն վայրերին, որոնք բավարար չափով ապահովված չեն շտապ օգնության ռեսուրսներով: Տվյալների վերլուծությունը ցույց է տվել, որ արտակարգ իրավիճակներին արձագանքելու ժամանակը կարող է կազմել մինչև 30 րոպե, ինչի պատճառով ողջ մնալու հավանականությունը գրեթե հավասարվում է զրոյի:
Այնուհետև թիմը ստուգել է, թե որքան ժամանակ է անհրաժեշտ թռչող սարքին: Հետազոտողները սարքի վրա ամրացրել են փոքր դեֆիբրիլյատոր, որը կշռել է 900 գրամ: Սարքը հագեցած է եղել նաև տեսախցիկով և սարքի օգտագործման համար նախատեսված ձայնային հրահանգներով: 18 փորձնական թռիչքների ընթացքում անօդաչու սարքը ժամանել է դեպքի վայր այն գործի դնելուց հինգ րոպե անց: Շտապ օգնության մեքենաներին անհրաժեշտ կլիներ միջինը 22 րոպե նույն դեպքի վայր ժամանելու համար: Դեֆիբրիլյատորը հագեցած է եղել բարձրախոսով` սարքի օգտագործման հրահանգները դեպքի վայրում գտնվող մարդկանց փոխանցելու համար, ինչը թույլ է տվել ավելի արագ ցուցաբերել անհրաժեշտ բժշկական օգնությունը:
Հետազոտական թիմն այժմ աշխատում է տեղական շտապ օգնության ծառայությունների հետ անօդաչու սարքերի առավել արդյունավետ կիրառման համար և հուսով է, որ համակարգը պատրաստ կլինի օգտագործման համար առաջիկա երկու տարիների ընթացքում:
