Radiology ամսագրում հրապարակված նոր արդյունքների համաձայն` արհեստական ինտելեկտի համակարգը ճշգրտորեն կանխատեսել է, թե երբ կմահանան սրտային հիվանդություններ ունեցող հիվանդները:
Հետազոտությունն իրականացվել է բժշկական ծառայությունների լոնդոնյան ինստիտուտի գիտնականների կողմից, ովքեր մշակել են ծրագրային ապահովում, որը կարող է վերլուծել արյան անալիզն ու սրտի ռիթմի 3D մոդելները: Փորձարկմանը մասնակցել է ավելի քան 256 հիվանդ` թոքային հիպերտոնիա ախտորոշմամբ (արյան բարձր ճնշման տեսակ, որն ազդում է թոքերի վրա և կարող է առաջացնել գլխապտույտ, ուշագնացություն և հևոց):
Հետևելով հիվանդի սրտի 30000 տարբեր կետերի շարժումներին` արհեստական ինտելեկտին հաջողվել է կառուցել օրգանի բարդ 3D սկանավորում: Համադրելով այս մոդելները հիվանդի վերջին ութ տարիների ընթացքում ստացված առողջական վիճակի մասին տվյալների հետ, համակարգը կարողացել է իմանալ, թե ինչպիսի անոմալիաներ են ազդարարել հիվանդի մահը` կանխատեսումներ անելով առաջիկա հինգ տարիների կտրվածքով:
Արհեստական ինտելեկտը կանխատեսել է 80% ճշգրտությամբ, թե որ հիվանդները կմահանան հաջորդ տարի: Բժշկի կանխատեսման միջին ճշգրտությունը կազմում է 60%:
Թոքային հիպերտոնիան ուղղեկցվում է արյան բարձր ճնշումով և սրտի աջ փորոքի ուժեղացված ծանրաբեռնվածությամբ: Որպես հետևանք` դա հանգեցնում է սրտային անբավարարության և վաղաժամ մահվան: Պարզելու համար, արդյոք հիվանդը գտնվում է բարձր ռիսկային խմբում, ինչպես նաև բուժում նշանակելու համար, բժիշկները բարդ ախտորոշում են իրականացնում:
Թոքային հիպերտոնիայի բուժման համար անհրաժեշտ են դեղամիջոցներ և թոքերի փոխպատվաստում, սակայն բուժման ընտրությունը կախված է նախիմացությունից: Այնուամենայնիվ, բժիշկներին ոչ միշտ է հաջողվում ճշգրտորեն կանխատեսել, թե որքան մեծ է հիվանդների առողջական վիճակի վատթարացման հավանականությունը: Արդյունքում, արհեստական ինտելեկտը նմանատիպ ճշգրտությամբ կարող է օգնել բժիշկներին ավելի արդյունավետ բուժել հիվանդներին:
«Արհեստական ինտելեկտն իրոք թույլ է տալիս յուրաքանչյուր հիվանդին անհատական բուժում առաջարկել» ,- ասել է հետազոտական թիմի անդամ դոկտոր Դեկլան Օ’Ռեգանը: «Այդպիսով, տարբեր հետազոտությունների արդյունքները թույլ կտան կանխատեսել, թե ինչ տեղի կունենա առանձին հիվանդների հետ: Այս ամենի շնորհիվ մենք կհասկանանք, թե որն է հիվանդի համար ամենարդյունավետ բուժումը»:
Վերջին շրջանում հիվանդությունների ախտորոշման ոլորտում ավելի շատ է կիրառվում արհեստական ինտելեկտը: Վերջերս Google ընկերությունը հայտարարել էր աչքերի հիվանդության ախտորոշման փորձարկումների հաջողության մասին` կիրառելով ծրագրային ապահովում մեքենական ուսուցման համար: Ավելի վաղ Հարվարդի բժշկական դպրոցի հետազոտողները ցուցադրել էին համակարգ, որը կարող է հայտնաբերել կրծքագեղձի քաղցկեղը 92% ճշգրտությամբ:
Հետազոտության վերջնական նպատակն է մշակել ծրագրային ապահովում, որը ոչ միայն կանխատեսում է հիվանդի մահը, այլ նաև առաջարկում է բուժման այն տեսակը, որն ավելի նպատակահարմար է կոնկրետ հիվանդի համար:
