Մասաչուսեթսի տեխնոլոգիական ինստիտուտը հայտարարել է արհեստական ինտելեկտի ստեղծման մասին, որը, դիտելով ճաշատեսակի նկարը, կարող է որոշել, թե ինչ բաղադրիչներից է այն կազմված: Pic2Recipe-ն ցուցադրում է 10 բաղադրատոմս, որոնք, իր կարծիքով, ավելի հստակ են արտացոլում ճաշատեսակի նկարը: Համակարգն ընտրում է ճիշտ բաղադրատոմսը 65% ճշգրտությամբ: Հաշվի առնելով բաղադրատոմսերի և ճաշատեսակների բազմազանությունը` արդյունքը տպավորիչ է:
Pic2recipe համակարգն օգտագործում է նեյրոնային ցանցեր տվյալ կերակրի բաղադրատոմսը որոշելու համար, փորձում է ստանալ արժեքավոր պատկերացում ճաշատեսակների նախասիրությունների մասին:
Համակարգը ստեղծվել է` օգտագործելով Food-101 տվյալների հավաքածուն`2014 թվականին շվեյցարացի գիտնականի կողմից ստեղծված մթերքների որոշման ալգորիթմը: Այն օգտագործում է սննդի ավելի քան 101 000 պատկերների տվյալների բազա:
Արհեստական ինտելեկտը ոչ միայն օգտագործում է արդեն գոյություն ունեցող բաղադրատոմսերը, այլ նաև ստեղծում է իր սեփական տարբերակները: Չնայած սննդի պատրաստումը ստեղծագործ աշխատանք է, սակայն այն ամեն դեպքում հիմնված է գիտության վրա: Գոյություն ունի մեթոդիկա, ըստ որի, որոշ բաղադրիչներ միմյանց հետ շատ լավ են համակցվում, իսկ մնացացները` ոչ: Դա այն է, ինչը համակարգիչը կարող է շատ հեշտությամբ սովորել:
Դեռ հայտնի չէ, թե ինչ տեսքով կներկայացվի այս նախագիծը: Հնարավոր է այն իրենից կներկայացնի գաջեթ, որը համատեղում է համակարգչային տեսողությունը և արհեստական ինտելեկտը և հետևում, թե ինչպես է մարդը պատրաստում` տալով խորհուրդներ: Կամ գուցե բջջային հավելված, որը կտեսնի, թե ինչ է պատրաստվել և օբյեկտիվորեն կքննադատի այն:
Հետազոտական թիմը նշում է, որ դեռ շատ աշխատանքներ պետք է տարվեն, և նորույթը դեռ պատրաստ չէ, որպեսզի հայտնվի շուկայում:
