Շրջակա միջավայրը մաքուր պահելու համար մարդկությունը պետք է կատարի երկու գործողություն` վնասակար գազերի արտանետման նվազեցում և ավելի շատ «կանաչ» էներգիայի աղբյուրներից էներգիայի արտադրում: Բազմաթիվ հետազոտական ծրագրեր փորձում են լուծել այս խնդիրներն առանձին, և շատ քչերը` միասին: Անտվերպենի և Լյովենի համալսարանների գիտնականները ստեղծել են սարք, որը վերաբերում է երկրորդ կատեգորիային` այն մաքրում է օդը և միաժամանակ արտադրում վառելիք:
Սարքն աշխատում է «հետերոգեն ֆոտոկատալիզ» անվանմամբ գործընթացի օգնությամբ: Այն օգտագործում է լույսը և հատուկ կատալիզատոր` քիմիական ռեակցիա առաջացնելու համար: Սարքի մեջ առկա է երկու մաս, որոնք բաժանված են թաղանթով: Մի կողմից օդը մաքրվում է ֆոտոանոդի միջոցով, մինչ ջրածինը ստացվում է կատոդի միջոցով:
Սարքն օգտագործում է կատալիզատորներ, որոնք ոչնչացնում են քաղաքային աղտոտված օդը, որից էլ այնուհետև անջատվում է ջրածինը` էկոլոգիապես անվտանգ վառելիք: Սարքի աշխատանքի համար անհրաժեշտ է միայն արևի լույս:
Այս տեխնոլոգիայի հիմքում ընկած են ֆոտոէլեկտրոքիմիական բջիջները, որոնք կատալիզատորների օգնությամբ արտադրում են ջրածին աղտոտված օդից: Այսպիսով, գիտնականները լուծել են երկու տեխնոլոգիական խնդիր` օդի մաքրման անհրաժեշտությունը և էներգիայի արտադրման այլընտրանքային տեխնոլոգիայի յուրացումը:
Հետազոտությունների ղեկավարի Վերբրյուգենի խոսքերով` անցյալում նմանատիպ տեխնոլոգիա օգտագործվել է ջրից ջրածնի առանձնացման համար, սակայն այժմ մենք հայտնաբերել ենք, որ դա հնարավոր է և նույնիսկ ավելի արդյունավետ աղտոտված օդի դեպքում: Ջրածինը հեշտ է պահել և հետագայում օգտագործել որպես վառելիք: Սակայն նախագծի թիմն ընդգծում է, որ սարքն ընդամենը հանդիսանում է մեծ հեռանկար ունեցող գաղափարի գործնական ապացույցը: Ներկայումս սարքը կազմում է ընդամենը մի քանի քառակուսի սանտիմետր, ինչը բավարար չէ օդի լիարժեք ֆիլտրացիայի և մարդկության էներգաապահովման համար ջրածնի արտադրման համար:
