Գերմանացի գիտնականները ստեղծել են ինտենսիվ լույսի ամենամեծ աղբյուրն աշխարհում, որի միջոցով կարելի է արտադրել էկոլոգիապես մաքուր վառելիք:
Synlight նախագիծն իրականացվում է գերմանական աէրոտիեզերական կենտրոնում, որը տեղակայված է Քյոլնից 50 կմ հեռավորության վրա: Այնտեղ հավաքվել է սարք, որը կազմված է 149 քսենոնային լամպերից: Այն ընդունակ է արտադրել լույս, որի ինտենսիվությունը բնական լուսավորությունից 10 000 անգամ ավելի շատ է:
Կենտրոնացնելով բոլոր լամպերի լույսը մեկ կետում` Synlight համակարգը տաքացնում է 20х20 սմ տարածքը մինչև +3500 °С, ինչը կարող է հալեցնել մետաղը:
Նախագծի գլխավոր նպատակն է ալտերնատիվ էներգետիկայի զարգացումը և ջրածնային վառելիքի արտադրումը: Ջրածինն ազատ վիճակում գոյություն չունի բնության մեջ` այն անհրաժեշտ է առանձնացնել ջրից, սակայն այդ գործընթացը պահանջում է էլեկտրաէներգիայի մեծ ծախսեր: Գիտնականները ցանկանում են շրջանցել այս խնդիրը` օգտագործելով արևի էներգիան:
Նմանատիպ լուսային տեխնոլոգիաներ արդեն գոյություն ունեն Ամերիկայի անապատում: Հսկայական չափերի հասնող արևային էլեկտրակայաններն օգտագործում են հայելիներ, որպեսզի կենտրոնացնեն արևի լույսը ջրի վրա: Այս ջերմությունն իր հերթին արտադրում է գոլորշիներ, որոնք պտտեցնում են տուրբինները և արտադրում են մաքուր էլեկտրաէներգիա:
Synlight թիմն ուսումնասիրում է, արդյոք կարող է իրենց արհեստական արևը կատարել նույն ֆունկցիան, բայց ջրածնային վառելիքի հետ:
Ջրածինը երբեմն անվանում են «ապագայի վառելիք», քանի որ ի տարբերություն նավթի և բնական գազի, այն չի արտադրում ածխաթթու գազ այրման ժամանակ: Ջրածնային վառելանյութերն արտադրվում են ջրային գոլորշուց քիմիական նյութի արտազատումից` գործընթաց, որը պահանջում է մեծ քանակությամբ էներգիա:
Գերմանական արհեստական արևն աշխատանքի համար պահանջում է հսկայական քանակությամբ էլեկտրաէներգիա: Ընդամենը չորս ժամ տևող գործընթացը սպառում է նույնքան էներգիա, որքան չորս անդամից բաղկացած ընտանիքը մեկ տարում: Այնուամենայնիվ, նախագիծը համարվում է հեռանկարային` դրա իրականացման համար Գերմանիայի էներգետիկայի նախարարությունը հատկացրել է մոտավորապես 3,5 միլիոն եվրո:
Առաջիկա մի քանի տարիների ընթացքում համակարգը կզարգանա այնքան, որ կաշխատի արևային մարտկոցներով: «Եթե մենք ցանկանում ենք, որպեսզի մեքենաները և ինքնաթիռներն աշխատեն էկոլոգիապես մաքուր վառելիքի հիման վրա, ապա մեզ անհրաժեշտ կլինի միլիարդավոր տոննա ջրածին»,- բացատրում են գաղափարի հեղինակները:
Վերջնական արդյունքում գիտնականները հույս ունեն օգտագործել արևային լույսը ջրածնի արտադրման համար:
