SpaceX և Tesla ընկերությունների գլխավոր տնօրեն Իլոն Մասկը մշակել է Neuralink անվանումը ստացած նախագիծը: Նախագիծն այժմ գտնվում է զարգացման նախնական փուլում, այն զբաղվում է իմպլանտային չիպերի մշակմամբ, ինչի շնորհիվ հնարավոր կլինի բարելավել հիշողությունը և արագացնել հաշվողական սարքերի հետ փոխգործակցությունը:
Վերջին վեց ամիսների ընթացքում Մասկը հաճախ է ակնարկել Neuralink-ի գոյության մասին, իսկ վերջերս Դուբայում կայացած հանդիպման ժամանակ նա ասել է, որ շատ շուտով մենք կտեսնենք կենսաբանական և թվային ինտելեկտի սերտ միաձուլում: Այն ենթադրում է ուղեղից դեպի տեխնիկական սարքավորումներ ինֆորմացիայի փոխանցման բարձր արագություն:
Նմանատիպ ինտերֆեյսերը առայժմ գիտական ֆանտաստիկայի ոլորտից են: Բժշկական ոլորտում իմպլանտներն օգտագործվում են Պարկինսոնի հիվանդության, էպիլեպսիայի և այլ նեյրոդեգեներատիվ հիվանդությունների դեպքում: Այնուամենայնիվ աշխարհում շատ քիչ է այն մարդկանց թիվը, որոնց ուղեղում տեղադրված են բարդ իմպլանտներ: Սա մասամբ այն պատճառով է, որ աներևակայելի դժվար է վիրահատել մարդկային ուղեղը և միայն նրանք, ովքեր դիմել են բոլոր հնարավոր բժշկական միջոցներին, որպես վերջին տարբերակ ընտրում են այս մեթոդը:
Սակայն դա չի կանգնեցնում հետազոտողներին, ովքեր հետաքրքրված են նմանատիպ գաղափարներով: Kernel ստարտափը` Բրայան Ջոնսոնի գլխավորությամբ, նույնպես փորձում է բարելավել մարդու իմացական կարողությունները: 2013 թվականին ստարտափը վաճառվել է PayPal-ին 800 միլիոն դոլարով: Kernel-ի` նեյրոգիտնականներից և ծրագրային ապահովման ճարտարագետներից կազմված թիմն աշխատում է նեյրոդեգեներատիվ հիվանդությունների հետևանքների վերացման վրա` դարձնելով մարդկային ուղեղն ավելի արագ և խելացի:
«Մենք գիտենք, որ եթե ուղեղում չիպ տեղադրենք և էլեկտրական ազդակներ արձակենք, ապա կկարողանանք բարելավել Պարկինսոնի հիվանդության ախտանշանները, ինչպես նաև պայքարել ճարպակալման և անորեքսիայի դեմ:», ասել է Ջոնսոնը:
Այնուամենայնիվ նմանատիպ սարքերի ստեղծման գործընթացում գիտնականները բազմաթիվ դժվարություների են բախվում, օրինակ` նեյրոկենսաբանները դեռ բավականաչափ պատկերացում չունեն մարդկային ուղեղում նեյրոնների փոխազդեցության մասին: Մեկ այլ խնդիր` գտնել կամավորներ իմպլանտների տեղադրման համար:
«Մարդիկ կկարողանան համակերպվել իրենց ուղեղում իմպլանտի տեղադրման մտքի հետ միայն այն ժամանակ, երբ դա կօգնի բարելավել առողջական վիճակը: Առողջ մարդկանց մեծ մասը պատրաստ չէ կամավոր կերպով վիրահատության դիմել»,- ասել է Տորոնտոյի համալսարանի գիտնական Բլեյկ Ռիչարդսը:
