Նմանատիպ եղանակով մեծ քանակությամբ մաշկի աճեցումը կարող է օգնել այն մարդկանց, ովքեր տառապում են հազվադեպ հիվանդություններով:
Մաշկի հազվագյուտ գենետիկական խանգարում ունեցող տղան կենդանի և առողջ է երկու տարի անց այն դեպքից հետո, երբ գենային թերապիայի փորձարարական տեխնիկան օգտագործվել է նրա մաշկի գրեթե մեկ քառակուսի մետր աճեցման և փոխարինման համար: Nature ամսագրում հրապարակված հոդվածում նկարագրվում է, թե ինչպես եվրոպացի բժիշկներն օգտագործել են գենային թերապիան մաշկի փոխպատվաստումների աճեցման մեթոդիկայով այրվածքներ ստացած մարդկանց օգնելու համար:
Յոթամյա տղան տառապում էր բուլյոզային էպիդերմոլիզով` հիվանդություն, որը կարող է դրսևորվել տարբեր ձևերով` կախված կոնկրետ գենետիկական մուտացիայից: Այս հիվանդությամբ տառապում է ավելի քան 25 000 մարդ ԱՄՆ-ում և 500 000 մարդ ամբողջ աշխարհում: New York Times-ի տվյալներով` բուժման նոր տեսակը կարող է օգնել ոչ բոլորին` հիվանդության դրսևորման տարբեր ձևերի պատճառով: Այնուամենայնիվ, սա մեծ առաջընթաց է` այդ հիվանդությամբ տառապող մարդկանց օգնելու համար: Եվ առաջին անգամն է, որ նման մեծ քանակությամբ մաշկ է հաջողությամբ փոխպատվաստվել:
Տղան, ամենայն հավանականությամբ, կմահանար, եթե նրան օգնության չգար փորձարարական բուժումը: Բժիշկ Միշել Դե Լյուքան, Իտալիայի Մոդենա համալսարանի Ստեֆանո Ֆերարիի ռեգեներատիվ բժշկության կենտրոնի տնօրենը, ղեկավարել է տղային բուժող բժիշկների թիմը:
Բժիշկները վերցրել են տղայի մաշկի փոքր նմուշ (մոտավորապես 3 քառակուսի մետր) և օգտագործել են վիրուսը` նրա ԴՆԹ-ում պատասխանատու գենի ոչ մուտացիոն ձևի ներդրման համար: Գիտնականներն աճեցրել են նոր մաշկը տղայի առողջ էպիդերմալ բջիջներից: Այնուհետև նրանք փոխարինել են երեխայի մարմնի վնասված հատվածները այդ նոր մաշկով: Տղան հիվանդանոցում անցկացրել է ութ ամիս, որոնցից չորսը եղել է արհեստական կոմայի մեջ` ցավային զգացողությունները հաղթահարելու համար:
