Apple Watch-ը շուտով կդառնա անփոխարինելի այն մարդկանց համար, ովքեր տառապում են շաքարախտով:
Ինչպես հայտնում է BGR-ը` հենվելով ապահով աղբյուրներից ստացված տեղեկությունների վրա, նոր սերնդի Apple Watch-ը հագեցած կլինի արյան մեջ շաքարի մակարդակը որոշող ներկառուցված չափիչ սարքով:
Աղբյուրի խոսքերով` Apple ընկերությունը մտադիր է ներկայացնել գլյուկոզայի մակարդակի որոշման իր տեսակի մեջ առաջին ոչ ինվազիվ մեթոդ` որպես իր նոր արտադրանքի բաղկացուցիչ մաս: Այլ կերպ ասած, շաքարի մակարդակի որոշման համար արյուն անհրաժեշտ չի լինելու:
Շաքարախտը համարվում է ամենատարածված և ամենածանր հիվանդություններից մեկն աշխարհում: Շաքարախտով տառապող հիվանդների հիմնական խնդիրն է արյան մեջ գլյուկոզայի մակարդակի կանոնավոր վերահսկումը: Նմանատիպ տեխնոլոգիան մեծ ձեռբերում է այս հիվանդությամբ տառապող մարդկանց համար, ովքեր, որպես կանոն, ստիպված են ստուգել գլյուկոզայի մակարդակը տարատեսակ ինվազիվ միջոցներով:
Հաղորդվում է, որ Apple ընկերությունն ընդլայնել է գիտնականներից, բժիշկներից և ինժեներներից կազմված իր թիմը` աշխատակիցների թիվը հասցնելով 200-ի, նրանք զբաղվում են շաքարի մակարդակը որոշող տվիչների նոր տեսակի ստեղծմամբ: Գիտնականներն արդեն մի քանի տարի է, ինչ աշխատում են խնդրի լուծման վրա, որը թույլ կտա օգտատերերին վերահսկել արյան մեջ շաքարի մակարդակն առանց դասական չափիչ սարքի կիրառման: Նշենք, որ նախկինում խումբը կազմված էր 30 աշխատակիցներից:
Սարքն աշխատում է հետևյալ սկզբունքով` այն արյան մեջ գլյուկոզայի մակարդակի մասին տվյալներ է հավաքում Apple Watch-ի մեջ ներկառուցված տվիչի միջոցով: Ծրագիրն ակտիվացնելուց հետո տվիչը պարբերաբար չափում և տվյալներ է հաղորդում հավելվածին: Ինչի շնորհիվ հիվանդը կարող է վերահսկել շաքարի մակարդակն արյան մեջ և ավելի ճշգրիտ որոշել ինսուլինի չափաբաժինը:
Հաղորդվում է, որ տեխնոլոգիան արդեն անցել է լաբորատոր փորձարկումների փուլը և ամբողջությամբ պատրաստ է կոմերցիոն օգտագործման համար: «Խելացի» ժամացույցների շուկայում հայտնվելու ամենահավանական ժամկետը 2017 թվականի աշունն է:
