Մարդկության պատմության մեջ առաջին անգամ ռոբոտը ստացել է իրական քաղաքացիություն: Սոֆիա անունը ստացած մարդանման ռոբոտը, օժտված արհեստական ինտելեկտի տեխնոլոգիաներով և մշակված Hanston Robotics հոնգկոնգյան ընկերության կողմից, ստացել է Սաուդյան Արավիայի թագավորության քաղաքացիություն: Այս մասին հաղորդել է հենց ինքը Սոֆիան` «Ապագայի ներդրումային նախաձեռնություն» միջոցառման ժամանակ ելույթ ունենալիս:
«Սա իրական պատմական իրադարձություն է ողջ աշխարհի համար, և ես շատ հպարտ եմ, որ ստացել եմ քաղաքացիություն»,-հայտարարել է Սոֆիան:
Լրագրողների այն հարցին, թե ինչու է նա այդքան երջանիկ, Սոֆիան պատասխանել է, որ «անչափ ուրախ է ելույթ ունենալ նման խելացի, հարուստ և ազդեցիկ մարդկանց առջև»:
Էմոցիաների փոխանցումը Սոֆիայի կարևորագույն առանձնահատկություններից մեկն է: Ռոբոտը կարող է տխրել, երբ դժգոհ է կամ ժպտալ` ցուցադրելով իր ուրախությունը: Ռոբոտի հեղինակներն այնպես են ծրագրավորել, որպեսզի նա կարողանա սովորել իրեն շրջապատող մարդկանցից: Այդ պատճառով զգացմունքների արտահայտումը և բարության ու կարեկցանքի ցուցաբերումը վառ օրինակ է, որ ռոբոտն իսկապես ցանկանում է սովորել` հետևելով իրեն շրջապատող մարդկանց: Բացի այդ Սոֆիան կարող է մասնակցել ինտելեկտուալ զրույցներին:
«Ես ցանկանում եմ ապրել և աշխատել մարդկանց հետ, այդ պատճառով ես պետք է կարողանամ արտահայտել զգացմունքներ`մարդկանց հասկանալու համար»,-բացատրել է Սոֆիան:
Դեռևս հայտնի չէ, արդյոք ռոբոտը կստանա մարդկային իրավունքներ, թե երկրի կառավարությունը պատրաստվում է մշակել իրավունքների առանձին համակարգ հատուկ ռոբոտների համար: Այնուամենայնիվ այս քայլը նպատակաուղղված է նոր ներդրողների ներգրավմանը արհեստական ինտելեկտի և ռոբոտեխնիկայի նոր տեխնոլոգիաների զարգացման ոլորտում:
