Ստեղծվել է աշխարհի ամենաբարակ մագնիսը, որը կարող է մեծ կիրառում գտնել քվանտային հաշվարկներում:
Վաշինգտոնի համալսարանի և Մասաչուսեթսի տեխնոլոգիական ինստիտուտի գիտնականներին հաջողվել է քրոմի և յոդի հիման վրա միացություն ստանալ: Իր կառուցվածքով միացությունը հանդիսանում է գրաֆենի նմանակ, որն ունի ընդամենը 1 ատոմի հաստություն: Ընդ որում, նոր միացությունն ունի արտահայտված մագնիսական հատկություններ` իրենից ներկայացնելով, ըստ էության, «հարթ երկչափ մագնիս»:
Բոլոր մագնիսային նյութերը կազմված են հատուկ մասերից, որոնք կոչվում են «տիրույթներ»: Որպես կանոն, նմանատիպ տիրույթներում էլեկտրոնների սպիներն ատոմներում թեքված են հարևան տիրույթների էլեկտրոնների սպիների ուղղությանը հակառակ: Ինչի շնորհիվ, մագնիսական դաշտ չունեցող որոշ մետաղներ կարող են մագնիսական հատկություններ ձեռք բերել արտաքին մագնիսական դաշտի ազդեցության տակ: Մագնիսական դաշտի ազդեցության տակ նյութերի հատկությունների փոխելու այս կարողությունն այսօր կիրառվում է ինֆորմացիայի պահպանման նոր մագնիսական համակարգերի մշակման համար: Մի քանի փորձարկումների ընթացքում գիտնականներին հաջողվել է ստեղծել երկչափ մագնիսների մի քանի տարբերակ` կիրառելով այն տեխնոլոգիան, որն օգտագործում էին գրաֆենի ստեղծողները այդ նյութի առաջին օրինակները ստանալու համար:
Նախագծի մասնակիցներից Սյադուն Սյուն ասել է. «Հայտնի է, որ քրոմի տրիյոդիդը` միացություն յոդի երեք ատոմից և քրոմի մեկ ատոմից, ունի մագնիսական հատկություններ, որոնք կարող են պահպանվել նաև այդ նյութի հարթ շերտերում»:
Իրականում այն այնքան բարակ է, որ համարվում է աշխարհի առաջին երկչափ մագնիսը, որն ունի ընդամենը 1 ատոմի հաստություն: «Երկչափ մագնիսներն անչափ հետաքրքիր են, դրանք թույլ են տալիս հստակ փոխել առանձին մասերի հատկությունները: Սակայն առավել հետաքրքիր է այս տեսակի մի քանի տարասեռ շերտերի համադրությունը: Այս դեպքում դրանց ներսում կարող են առաջանալ էկզոտիկ երևույթներ, որոնք մենք երբեք նախկինում չենք տեսել»,- ասել է Սյադուն Սյուն:
