Վերջին շրջանում Google ըկներությունն ավելի հաճախ է շեշտը դնում արհեստական ինտելեկտի օգտագործման վրա` հանդես գալով որպես ընկերություն, որը մասնագիտացած է արհեստական ինտելեկտի ոլորտի մշակումների վրա: Ընկերության նոր նախագիծը, որը ստացել է DeepMind անվանումը, անընդհատ ձեռք է բերում նոր կարողություններ, իսկ վերջերս այն սովորել է կոորդինացնել շարժումներն անծանոթ միջավայրում:
Որպես կանոն, արհեստական ինտելեկտի համակարգերի ուսուցման համար օգտագործվում են հազարավոր օրինակներ, որոնք մանրակրկտորեն վերլուծվում են: Նեյրոցանցի միջոցով հնարավոր է ստանալ գրեթե ամեն ինչ` պատկերներ, երաժշտություն, լուսանկարներ: Սակայն DeepMind թիմի ուսումնասիրությունները հետաքրքիր են նրանով, որ արհեստական ինտելեկտի ուսուցումն անցկացվում է խթանման ալգորիթմի միջոցով (reinforcement learning), որը համակարգին թույլ է տալիս ինքնուրույն ձեռք բերել նոր հմտություններ: Այն իրենից ներկայացնում է մեքենական ուսուցման համար կիրառվող սովորական գործիք, որը կիրառել են մշակողները արհեստական ինտելեկտին խոչընդոտներ հաղթահարել սովորեցնելու համար:
Այսպիսով, էկրանին գտնվող վիրտուալ մարդուկը, չունենալով ոչ մի պատկերացում շրջակա միջավայրի մասին, սովորում է կողմնորոշվել և հաղթահարել խոչընդոտները փորձերի և սխալների մեթոդի հիման վրա: Նրա բոլոր շարժումները փոքր-ինչ ծիծաղելի են և շատ նման են ոչ սթափ վիճակում գտնվող մարդու շարժումներին: Այնուամենայնիվ, արհեստական ինտելեկտի ձեռքբերումները տպավորիչ են: Այն դեռ իրենից ներկայացնում է համակարգ, որը նոր է փորձում ընկալել շրջակա միջավայրը:
Նմանատիպ մշակումներն անչափ հեռանկարային են: Ժամանակի ընթացքում դրանք կարող են վերածվել ռոբոտոտեխնիկայի կառավարման համակարգերի, ինչն էլ հնարավորություն կտա օգնել սահմանափակ կարողություններ ունեցող մարդկանց:
