Soul Machines ընկերությունը ստեղծել է վիրտուալ զրուցող ռոբոտ, որը կարող է ոչ միայն պատկերել էմոցիաները, այլ նաև վերլուծել զրուցակցի դեմքի արտահայտությունը: Նախագծի նպատակն է դուրս բերել զրուցող ռոբոտների ծառայությունները նոր մակարդակի`դարձնելով նրանց ավելի մարդանման:
Nadia ռոբոտը տեսնում է զրուցակցին վեբ տեսախցիկի միջոցով`նրա հույզերն ավելի լավ հասկանալու համար: Soul Machines-ը պնդում է, որ ռոբոտն ունի «հուզական ինտելեկտ» կամ EI, ինչն էլ թույլ է տալիս ռոբոտին հաղորդակցվել մարդկանց հետ ավելի նուրբ հուզական մակարդակի վրա:
Ինչքան շատ է Nadia-ն հաղորդակցվում իրական մարդկանց հետ, այդքան ավելի լավ է հասկանում նրանց հույզերը: Եթե զրուցակցի մոտ նկատվում է ձայնի կամ դեմքի արտահայտության փոփոխություն, Nadia-ն դա հասկանում է և իր պատասխաններն այնպես է ձևակերպում, որ դրանք ավելի տեղին լինեն`հաշվի առնելով զրուցակցի ներկայիս հուզական վիճակը:
Ռոբոտի հեղինակը Մարկ Սագարն է, ով հանդիսանում է Soul Machines ընկերության գործադիր տնօրենը և Օքլենդ համալսարանի պրոֆեսոր: Նա արժանացել է «Օսկար» մրցանակի գիտական և ինժեներական ձեռքբերումների համար:
Նրա տաղանդի և փորձի շնորհիվ Nadia-ն չափազանց իրական է, ինչը որոշ չափով վախեցնում է: Սակայն, իրականում, նա չի պատրաստվում ոչնչացնել մարդկությունը: Ընդհակառակը, նա փորձում է օգնել սահմանափակ կարողություններ ունեցող մարդկանց: Ի դեպ, Nadia-ն խոսում է դերասանուհի Քեյթ Բլանշետի ձայնով:
Ռոբոտն օգնում է օգտատերերին մուտք գործել հաշմանդամության պետական ապահովագրության ծրագիր (NDIS) և գտնել բոլոր անհրաժեշտ տեղեկությունները: Ծրագիրը բավականին բարդ է, ինչի պատճառով սահմանափակ կարողություններ ունեցող մարդիկ հաճախ դժվարությունների առաջ են կանգնում: Nadia-ն ստեղծված է, որպեսզի օգնի նրանց հասկանալ ամեն ինչ և «մարդկային» օգնություն ցուցաբերի ցանկացած պահին ցանկացած վայրում:
Նման նախագծի հնարավորություններն անսահման են: Soul Machines-ն արդեն սկսել է ստեղծել նմանատիպ ռոբոտներ`նախատեսված արդյունաբերության այլ ոլորտների համար: Զարմանալի չի լինի, եթե շուտով ընկերությունները սկսեն օգտագործել նմանատիպ ռոբոտներ հաճախորդների հետ շփման համար:
