Ողջույն հարգելի ընթերցողներ։ Այսօր ուզում եմ Ձեզ ներկայացնել տվյալների փոխանցման հաղորդակարգերը (պրոտոկոլ) (communications protocol)։ Ես մասնավորապես կխոսեմ ցանցային հաղորդակարգի մասին (HTTP, HTTPS, FTP, SMTP, FTPS, POP)։
Տվյալների փոխանցման հաղորդակարգն իրենից ներկայացնում է ինտերֆեյսի տրամաբանական մակարդակի համաձայնությունների հավաքածու, որը սահմանում է տարբեր ծրագրերի միջև տվյալների փոխանակումը։ Այս համաձայնությունները սահմանում են հաղորդագրությունների փոխանցման և սխալների մշակման վերաբերյալ միասնական մեթոդ որևէ ինտերֆեյսով միացված ծրագրային ապահովումների փոխգործունեության ժամանակ։
Ցանցային հաղորդակարգը կանոնների և գործողությունների (գործողությունների հաջորդականության) հավաքածու է, որը թույլ է տալիս իրականացնել միացում և տվյալների փոխանակում ցանցին միացած երկու և ավելի սարքերի միջև։
Ցանցային հաղորդակարգերն ունեն բարդ կառուցվածք։ Ես չեմ փորձի այն Ձեզ ներկայացնել, այլ ուղղակի կներկայացնեմ դրանց առավել տարածված տարատեսակները։
Համացանցում առավել օգտագործվող հաղորդակարգեր․
- HTTP(HyperText Transfer Protocol) – հիպերտեքստի փոխանակման հաղորդակարգ։ Այս հաղորդակարգը օգտագործվում է միևնույն ցանցին միացված համակարգիչների միջև Web-էջերի փոխանակման ժամանակ։
- HTTPS(HyperText Transfer Protocol Secure) – նախորդ հաղորդակարգի կոդավորված տեսակն է, այսինքն տվյալները փոխանցվում են կոդավորված տեսքով։
- FTP(File Transfer Protocol) – սա հանդիսանում է հաղորդակարգ, որով հատուկ ֆայլային սերվերից օգտագործողի համակարգչին են փոխանցվում ֆայլերը։ FTP-ն օգտագործողին հնարավորություն է տալիս փոխանակվել երկուական և տեքստային ֆայլերով ցանցի յուրաքանչյուր համակարգիչի հետ։
- FTPS(File Transfer Protocol Secure) – նախորդ հաղորդակարգի կոդավորված տեսակն է, այսինքն ֆայլերը փոխանցվում են կոդավորված տեսքով։
- POP(Post Office Protocol) – փոստային միացման ստանդարտ հաղորդակարգն է։POP սերվերները մշակում են մուտքային փոստը, իսկ POP հաղորդակարգը նախատեսված է օգտագործողներից հաղորդագրություն ստանալու հարցումները մշակելու համար։
- SMTP(Simple Mail Transfer Protocol) – հաղորդակարգ է, որը սահմանում է մի շարք կանոններ էլ․ նամակ ուղարկելու համար։ SMTP սերվերը վերադարձնում է կամ ընդունման հաստատում, կամ սխալի մասին հաղորդագրություն, կամ էլ լրացուցիչ տեղեկություններ է պահանջում։
Որևէ հարց ունենալու դեպքում կարող եք գրել մեկնաբանություններում։
Շնորհակալություն մեր բլոգից օգտվելու համար։
