Այս մեթոդն ապագայում կարող է հանգեցնել քաղցկեղի բուժման բարելավմանը:
Վերջերս Angewandte Chemie ամսագրում հրապարակված ուսումնասիրության մեջ հետազոտողները ցուցադրել են, որ վիզուալիզացման մեթոդը, որը կոչվում է սկանավորման էլեկտրաքիմիական մանրադիտություն, կարող է դառնալ անչափ օգտակար բժշկական գործիք: Լրացուցիչ քիմիական նյութեր օգտագործելու փոխարեն, ինչպիսիք են ներկանյութերը կամ ֆլուորեսցենտ մարկերները, այս մեթոդն օգտագործում է էլեկտրաքիմիական զոնդեր հյուսվածքի շուրջ բնական բիոմոլեկուլների հայտնաբերման համար:
Հետազոտողներն օգտագործել են փափուկ միկրոէլեմենտներ, որոնց միջոցով մշակվել են հյուսվածքների նմուշները: Այս գործընթացի ընթացքում նրանք չափել են հյուսվածքներում որոշակի քիմիական նյութերի կողմից ստեղծված էլեկտրական հոսանքը` այս հյուսվածքի ֆիզիկական կառուցվածքի, ինչպես նաև բաղադրության մասին պատկերացում կազմելու համար:
Թիմը ներկայացրել է տեխնոլոգիայի օգտագործման երեք առանձին տարբերակ: Առաջին փորձի ժամանակ նրանք ուսումնասիրել են մկան լյարդը` ցույց տալու համար, որ նանոածխածնի կոնկրետ տեսակը, որն ուսումնասիրվում է որպես դեղամիջոցի մատակարարման պոտենցիալ մեխանիզմ, կարող է տարածվել ամբողջ լյարդով: Երկրորդ փորձարկման ընթացքում զոնդերը չափել են հեմոգլոբինի սպիտակուցների քանակը` մկան սրտի ամբողջական պատկերը ստանալու համար: Իսկ երրորդ փորձարկման ժամանակ հետազոտողներն օգտագործել են այս տեխնոլոգիան` ցուցադրելու համար, որ այն կարող է հստակ տարբերակել մարդու առողջ հյուսվածքը քաղցկեղային հյուսվածքից:
Հետազոտողները հույս ունեն, որ ապագայում կկարողանան զարգացնել այս մեթոդը` ոչ միայն քաղցկեղային բջիջները հայտնաբերելու, այլ նաև դրանք ոչնչացնելու համար:
