Amabrush ընկերությունը որոշել է օգտվել Kickstarter կրաուդֆանդինգային հարթակից իր «առաջին ավտոմատ ատամի խոզանակի» նախագծի իրականացման համար: Պահանջվող 50 000 եվրոյի փոխարեն ընկերությունն ընդամենը երկու օրվա ընթացքում կարողացել է հավաքել ավելի քան 280 000 եվրո: Մարդիկ իսկապես հիացած էին այս գաղափարով, թե որքան հեշտ և հարմարավետ սարքավորում է ստեղծվել ավանդական ատամի խոզանակների փոխարեն: Խոզանակը բաղկացած է երեք մասերից` փափուկ ներդրուկից, որն օգտատերը տեղադրում է բերանում, վիբրացիոն հաղորդակից, ինչպես նաև ատամի մածուկի համար նախատեսված պարկուճներից:
Խոզանակի հանվող հատվածը պատրաստված է հակաբակտերիալ սիլիկոնից և հեշտությամբ կարելի է լվանալ ջրով: Նորույթի ստեղծման ժամանակ հետազոտողներն ուսումնասիրել են ծնոտների ավելի քան 2000 տարբեր տեսակներ և մշակել են ատամների մաքրման ունիկալ համակարգ: Էլեկտրոնային հատվածը լիցքավորվում է անլար եղանակով: Մեկ լիցքավորումը բավարար է 28 մաքրման համար: Եվ այս գործընթացի համար անհրաժեշտ կլինի ընդամենը 10 վայրկյան: Ատամի մածուկ պարունակող պարկուճը միանում է խոզանակին մագնիսական ամրակի միջոցով: Արտադրողը վստահեցնում է, որ կթողարկի պարկուճների տարատեսակ տարբերակներ` (օրինակ` թարմացնող, սպիտակեցնող և ֆտորով) յուրաքանչյուրը 3 եվրո արժողությամբ: Մեկ պարկուճը կարելի է օգտագործել մեկ ամսվա ընթացքում:
Amabrush խոզանակի մեկ կոմպլեկտի արժեքը սկսվում է 69 եվրոյից: Առաջին խոզանակները գնորդները կարող են ձեռք բերել այս տարվա դեկտեմբերին:
