Apple ընկերությունը վարձել է կենսաբժշկական հետազոտողների մի խումբ, ովքեր աշխատում են գաղտնի նախագծի վրա, որը վերահսկելու է գլյուկոզայի մակարդակը մաշկի հետ շփման, այլ ոչ թե արյան ինվազիվ հետազոտության կամ նմանատիպ մեխանիզմների միջոցով, այս մասին հայտնում է CNBC-ը: Սարքի առանձնահատկությունը կայանում է նրանում, որ ախտորոշման համար արյուն անհրաժեշտ չի լինելու, այսինքն սենսորները լինելու են ոչ ինվազիվ:
Վիճակագրական տվյալներով` ամբողջ աշխարհում շաքարախտով տառապում է ավելի քան 371 միլիոն մարդ, և վերջին մի քանի տարիների ընթացքում մի շարք տեխնոլոգիական ընկերություններ փորձել են գտնել հիվանդների համար լավագույն լուծումները:
Apple ընկերության նախագիծը շարունակվում է ավելի քան հինգ տարի և այժմ այն պատրաստ է անցնել փորձարկումների իրականացման փուլը: Apple-ը մշակում է օպտիկական սենսորներ, որոնք լույս են արձակում մաշկի միջով` գլյուկոզայի մակարդակը որոշելու համար:
Թիմը ղեկավարում է Apple-ի ապարատային ապահովման տեխնոլոգիաների հարցով ավագ փոխնախագահ Ջոնի Սրոուջին: Թիմը բաղկացած է մոտավոր 30 մարդկանցից, ովքեր կենսաբժշկության ոլորտի ներկայացուցիչներ են:
Չնայած դեռ հնարավոր չէ հաստատել նախագծի մանրամասները, սակայն այն համապատասխանում է ընկերության նախկին պատկերացումներից մեկին: Սթիվ Ջոբսը կարծում էր, որ Apple ընկերությունը մի օր կգտնվի տեխնոլոգիաների և կենսաբանության հատման գծում: Apple Watch-ն արդեն գոյություն ունի, այն հաշվարկում է քայլերի և այրված կալորիաների քանակը, ինչպես նաև սրտի ռիթմի և այլ կենսաբանական ցուցանիշներ: Այս շարքին ավելանում է սենսոր, որը մարդիկ կարող են վերցնել իրենց հետ ցանկացած վայր գնալիս և որի օգնությամբ կկարողանան որոշել գլյուկոզայի մակարդակը առանց արյան անհրաժեշտության:
