Ժամանակակից խելացի տեսախցիկների մեծ մասը նախատեսված է բնակարանի վերահսկման համար, մինչդեռ Amazon-ի նոր արտադրանքը նախատեսված է կատարել անձնական ոճաբանի գործառույթներ: Գաղափարը կայանում է նրանում, որպեսզի օգտատերը կարողանա լուսանկարվել այս կամ այն հագուստով, ապա ընտրել առավել համապատասխան հանդերձանքը:
Amazon ընկերությունը ներկայացրել է Echo Look տեսախցիկը, որը կառավարվում է ձայնի միջոցով: Alexa վիրտուալ օգնականի միջոցով այն կարող է խորհուրդներ տալ` կապված հագուստի ընտրության հետ:
Echo Look սարքը` հագեցած նոր տեսախցիկով, այժմ կարող է ամեն ինչ տեսնել և լսել: Այն իրենից ներկայացնում է սելֆիի համար նախատեսված սարք, այդ պատճառով օգտատերերը կարող են ինքնուրույն լուսանկարվել: Սարքը նման է վերջին սերնդի ինտելեկտուալ տեսախցիկներին` այն ունի երկարավուն ձև, տեսախցիկ և բարձրախոս: Տեսախցիկը հագեցած է ներկառուցված տվիչով: Alexa ձայնային օգնականի միջոցով օգտատերերը կարող են նաև իմանալ եղանակի մասին, որպեսզի հագնվեն եղանակին համապատասխան:
Սարքն աշխատում է Alexa ձայնային հրամանի օգնությամբ: Ձայնային հրամանների օգնությամբ սարքը լուսանկարում է, այնուհետև գնահատում օգտվողի արտաքին տեսքը բջջային սարքի էկրանից: Ընդ որում, տեսախցիկը որոշում է պատկերի խորությունը: Սարքը խորհուրդներ է տալիս «նորաձևության միտումների, ինչպես նաև ընտրված հագուստի չափի, գույնի և ոճի» հիման վրա:
Հավելվածն օգտագործում է մեքենական ուսուցման և փորձագետների խորհրդատվությունների համադրություն: Այն նաև աշխատում է Style Check ֆունկցիայով, որն օգտագործում է մեքենական ուսուցումը երկու կերպարներից ավելի համապատասխանն ընտրելու համար:
Echo-ն անընդհատ թարմացվում է և շուտով կունենա ավելի շատ ֆունկցիոնալ հնարավորություններ: Ներկայումս այն կարելի է ձեռք բերել 200 դոլարով:
