Գիտնականներին հաջողվել է ստեղծել երաժշտական գործիք, որը հնարավոր է նվագել մտքերի միջոցով:
Գործիքը ստացել է Encephalophone անվանումը` «enceph» նշանակում է «գլուխ», այս մասին հաղորդում է Frontiers in Human Neuroscience ամսագիրը: Սա ուղղակի զվարճանքի աղբյուր չէ: Հետազոտողները հույս ունեն, որ մի գեղեցիկ օր այս համակարգչային ինտերֆեյսը կկարողանա օգնել շարժողական խանգարումներ ունեցող մարդկանց:
Դա նախատեսված է ապագայի համար: Ներկայումս հետազոտությունն իրականացվել է 15 առողջ մարդկանց հետ: Նրանց գլխին տեղադրել են հատուկ գլխարկ, որը կարողացել է չափել էլեկտրական ազդանշաններն ուղեղում: Գլխարկը գրանցել է ուղեղի ազդանշանների երկու տեսակ: Առաջին տեսակը ստեղծվում է, երբ մասնակիցները փակում են աչքերը, իսկ մյուսը` երբ մտածում են տեղաշարժման մասին:
Գլխարկն ուղեղի ազդանշանները վերածում է նոտաների, որոնք այնուհետև կարող են վերարտադրվել սինթեզատորի օգնությամբ: Բոլոր մասնակիցներն առանց հատուկ ուսուցում անցնելու կարող էին հեշտորեն նվագել: Գլխարկն առավել ճշգրիտ էր, երբ մասնակիցը փորձում էր կառավարել այն, փակելով աչքերը, սակայն գիտնականներն ի վերջո ավելի հետաքրքրված են, թե ինչ է տեղի ունենում, երբ նա մտածում է տեղաշարժման մասին:
Հիմնական նպատակը կայանում է նրանում, որ գործիքը հնարավոր կլինի օգտագործել մարդկանց վերականգնման ժամանակ: Երաժշտությունն արդեն օգտագործվում է մարդկանց ուղեղի ֆունկցիան վերականգնելու համար, իսկ այս գործիքը հնարավոր կլինի օգտագործել նմանատիպ թերապիայի դեպքում:
Սակայն դեռ շատ աշխատանքներ պետք է տարվեն: Այժմ հետազոտողներն աշխատում են գործիքի կատարելագործման վրա, որպեսզի այն կարողանա ձայների ավելի լայն սպեկտր ներկայացնել: Իսկ արդեն 2017 թվականի վերջին մասնագետները կսկսեն փորձարկումներ իրականացնել սահմանափակ կարողություններ ունեցող մարդկանց վրա:
