Google ընկերության հետազոտողներն արհեստական ինտելեկտի հիման վրա տեխնոլոգիա են մշակել, որն ընդունակ է ստեղծել ձայներ, որոնք մարդը երբեք չի լսել: Համակարգի ստեղծողներն են Ջեսի Էնգելը, Սինյոն Ռեզնիկը և Google Brain-ի` ընկերության արհեստական ինտելեկտով զբաղվող գլխավոր լաբորատորիայի թիմի այլ անդամներ: Տեխնոլոգիան կոչվում է NSynth կամ նեյրոնային սինթեզատոր և նկարագրվում է որպես «երաժշտություն սինթեզելու նոր մոտեցում, որը նախատեսված է բարելավել ստեղծագործական գործընթացը»:
Կարող է թվալ, որ NSynth-ի օգնությամբ հետազոտողներն ուղղակի միաժամանակ նվագում են երկու գործիքների վրա կամ իրար են միացնում մի քանի հնչյուններ, սակայն իրականում դա այդպես չէ: Ծրագրային ապահովումը ստեղծում է բոլորովին ունիկալ ձայներ` օգտագործելով «նոտաների մաթեմատիկական բնութագրերը», որոնք առաջանում են տարբեր գործիքներից: NSynth-ը կարող է աշխատել ավելի քան 1000 տարատեսակ գործիքների հետ` ջութակից մինչև դիջերիդու: Այս ձայների համակցությունները ստեղծում են անհամար նոր փորձառություններ:
«Ի տարբերություն դասական սինթեզատորի, որը ստեղծում է ձայնը ձեռքով մշակված բաղադրիչներից, ինչպիսին են օսցիլյատորները և ալիքային աղյուսակները, ձայների ստեղծման համար NSynth-ն օգտագործում է խոր նեյրոնային ցանցեր»,- ասել է թիմը: «NSynth-ը սովորում է անմիջականորեն տվյալներից, արվեստագետներին ընձեռում է տեմբրի և դինամիկայի ինտուիտիվ վերահսկողության, ինչպես նաև նոր ձայներ ուսումնասիրելու հնարավորություն, որոնք շատ դժվար կամ նույնիսկ անհնար կլիներ վերարտադրել ձեռքով լարած սինթեզատորի միջոցով»:
Երաժշտական քննադատ Մարկ Վայդենբաումը պատմել է, որ գաղափարը նոր չէ, սակայն մենք այժմ ավելի քան փորձառու ենք այս հարցում: «Գործիքների միավորումը նոր չէ, գեղարվեստական առումով` այն կարող է թույլ տալ ստեղծել մի շարք հետաքրքիր նորություններ, և քանի որ այս ամենը ներկայացվում է Google-ի կողմից, այն կհետաքրքրի մարդկանց»,- հայտարարել է նա:
Մենք ցանկացել ենք երաժիշտների համար մշակել ստեղծագործական գործիք, ինչպես նաև մեքենական ուսուցմամբ զբաղվող ընկերություններին նոր հնարավորություն ընձեռել երաժշտության գեներատիվ մոդելների բնագավառում հետազոտությունների խթանման համար»,-ասում են NSynth-ի մշակողները:
