Վերջերս, Միլանում կայացած ավտոմոբիլային շոուներից մեկի ժամանակ, Honda ընկերությունը ներկայացրել է CB4 Interceptor կոնցեպտը, որն օգտագործում է քամու էներգիա:
Միլանում ցուցադրված CB4 Interceptor դիզայնը Հռոմում գտնվող հետազոտական կենտրոնի կողմից իրականացված աշխատանքն է: CB4-ի սկզբնական կոնցեպտը ներկայացվել է դեռ 2015 թվականին: Նոր մոդելն առաջին հերթին տարբերվում է իր դիզայնով:
Քամու էներգիայի օգտագործումն ապահովում է հատուկ տուրբինը, որը շրջապատում է լուսադիոդային լուսարձակը: Երբ մոտոցիկլետը շարժվում է, տուրբինը պտտվում է, ստեղծելով կինետիկ էներգիա, որը սնուցում է բենզինի բաքի վերին հատվածում ներկառուցված օգտատիրոջ էկրանը: Սենսորային էկրանը ցուցադրում է անհրաժեշտ քարտեզները, ապահովում է կապ հեռախոսի և այլ էլեկտրոնային սարքերի հետ:
Դեռևս մանրամասներ չեն հաղորդվում, թե ինչպես է աշխատում քամու էներգիայով աշխատող համակարգը, սակայն այն օգտագործում է էներգիայի պահպանման որոշակի մեխանիզմ: Հակառակ դեպքում էկրանը կդադարի աշխատել, երբ մոտոցիկլետը դադարի շարժվել:
2015 թվականին ներկայացված Honda CB-ի օրիգինալ կոնցեպտն այս տարվա մոդելի հետ ունի դիզայնի բազմաթիվ ընդհանուր էլեմենտներ: Շարժիչը, արգելակները և արտանետման համակարգը մնացել են նույնը:
Honda-ն միակը չէ, որ օգտագործում է քամու էներգիան մոտոցիկլետների աշխատանքի համար: Bandit9-ի Lit Concept մոդելը շարժիչի շուրջ ունի տուրբին, որն օգնում է այն հովացնել:
