Ավելի վաղ այս տարի Intel ընկերությունը հայտարարել էր իսրայելական Mobileye ընկերության ձեռքբերման մասին (15 միլիարդ դոլար արժողությամբ), որը զբաղվում է անօդաչու տեխնոլոգիաների մշակմամբ: Intel-ը հաստատել է գործարքի կնքման մասին լուրը և ընկերությունների միավորման շրջանակներում հայտարարել է 100 մեքենաների փորձարկումների մեկնարկի մասին:
Mobileye-ը պատրաստվում է արտադրել ավտոմատացման 4-րդ մակարդակի անօդաչու սարքավորումներ` օգտագործելով մեքենաների մի քանի ապրանքանիշեր և տրանսպորտային միջոցների տեսակներ: Նպատակը այս տեխնոլոգիայի արդյունավետության ցուցադրությունն է, ինչպես նաև առաջին «անօդաչու» մեքենաների մեկնարկը ԱՄՆ-ում, Իսրայելում և Եվրոպայում արդեն այս տարվա վերջ:
Mobileye ընկերության տեխնիկական գծով տնօրեն և համահիմնադիր Ամնոն Շաշուան, ով մոտ ապագայում կարող է դառնալ Intel Corporation-ի փոխնախագահը և Mobileye-ի գլխավոր տնօրենը, մեկնաբանել է հայտարարությունը. «Իրական պայմաններում իրականացվող փորձարկումները կարող են արագացնել տեխնոլոգիաների մշակումը: Անչափ կարևոր է փորձարկել մեքենաները աշխարհագրական տարբեր շրջաններում` հասկանալու համար, թե ինչպես իրենց կդրսևորեն տարբեր ճանապարհային պայմաններում»:
Intel-ը հայտարարում է, որ տեխնոլոգիան համադրում է Mobileye-ի (համակարգչային տեսողություն, սենսորներ, դիմային և հետին հատվածի տեսախցիկներ, քարտեզագրում, ավտոմատ վթարային արգելակում) և Intel-ի (բաց հաշվողական հարթակներ, տվյալների և 5G-տեխնոլոգիաների մշակման ոլորտում փորձ) տեխնոլոգիաները:
