Ընկերությունն աշխատում է «Loihi» նեյրոմորֆիկ տեխնոլոգիայի վրա արդեն ավելի քան վեց տարի:
Բազմաթիվ տեխնոլոգիական ընկերություններ, ինչպիսիք են` Apple-ը, Google-ը, Microsoft-ը, NVIDIA-ն և Intel-ը, ստեղծել են չիպեր դեմքի ճանաչման և խորը ուսուցման այլ աշխատանքների համար: Ընդ որում, Intel-ը ներկայացնում է մեկ այլ մոտեցում` օգտագործելով «Loihi» անվանումն ունեցող փորձարարական չիպը: «Չմշակված» հաշվողական հզորության վրա հենվելու փոխարեն` այն օգտագործում է «նեյրոմորֆիկ» տեխնոլոգիայի տեսակ:
Intel-ն արդեն մի քանի տարի շարունակ զբաղվում է նեյրոմորֆիկ տեխնոլոգիաների ուսումնասիրությամբ և նույնիսկ մշակել է չիպ 2012 թվականին: Այն օգտագործում է «իմպուլսային նեյրոններ» որպես հիմնարար հաշվիչ միավոր: Դրանք կարող են փոխանցել տարբեր ուժգնություն ունեցող ազդանշաններ` մարդու ուղեղի նեյրոնների նման:
Loihi չիպն ունի 1024 արհեստական նեյրոն կամ 130000 նմանակող նեյրոններ 130 միլիոն հնարավոր սինապտիկ (միջնեյրոնային) միացություններով: Այս ցուցանիշը դեռևս հեռու է մարդու 80 միլիարդ նեյրոնների թվից:
Մարդկային ուղեղն աշխատում է ինֆորմացիայի փոխանցման միջոցով իմպուլսների, հաճախակի միացությունների ուժեղացման և սինապտիկ միացություններում փոփոխությունների տեղային պահպանման օգնությամբ: Որպես այդպիսին, գլխուղեղի բջիջները միայնակ չեն գործում, քանի որ մեկ նեյրոնի գործունեությունն ուղղակիորեն ազդում է մնացածի գործունեության վրա, և բջիջների խմբի համատեղ աշխատանքը հանգեցնում է ուսուցման և ինտելեկտի:
Նմանակելով այդ վարքագիծը` Loihi չիպի միջոցով հնարավոր կլինի արագացնել մեքենական ուսուցումը, միաժամանակ նվազեցնելով հզորության պահանջները մինչև 1000 անգամ: Ավելին, ուսուցումը հնարավոր կլինի անցկացնել չիպի վրա, և չեն պահանջվի հսկայական քանակությամբ տվյալներ: Եթե նմանատիպ չիպերը միացնել համակարգչին, ապա դրանք ինքնուրույն կկարողանան նոր գիտելիքներ ստանալ:
«Փորձարարական չիպն ունի մեծ ներուժ ավտոմոբիլային և արդյունաբերական ծրագրերի, ինչպես նաև անձնական ռոբոտների բարելավման համար»,- ասել են Intel ընկերության աշխատակիցները:
Ընկերությունը ծրագրում է Loihi չիպը փոխանցել առաջատար համալսարաններին և հետազոտական ինստիտուտներին, որոնք աշխատում են արհեստական ինտելեկտի բնագավառում 2018 թվականի առաջին կեսին: Նպատակը չիպի հնարավորությունների ստուգումն է արհեստական ինտելեկտի նոր ծրագրերի հետագա զարգացման համար: Ապագայում ընկերությունը կստեղծի չիպեր, օգտագործելով 14-նանոմետրանոց տեխնոլոգիան, և նոյեմբերին կթողարկի առաջին փորձարարական մոդելը:
