Փորձարկումների ժամանակ ISRIB անվանումը ստացած դեղամիջոցն ամբողջությամբ վերականգնել է սովորելու և հիշելու կարողությունը վնասված գլխուղեղով մկների, նույնիսկ մեկ ամիս առաջ վնասվածք ստացած մկների մոտ:
Փորձարարական դեղամիջոցը կարող է օգնել գլխուղեղային վնասվածքների հետևանքով հիշողության հետ խնդիրներ ունեցող մարդկանց: Ամերիկացի գիտնականների կողմից իրականացված հետազոտության ընթացքում ստացված եզրակացությունները հակասում են գլխուղեղային վնասվածքների ուսումնասիրությունների մեծ մասին: Նախկինում համարվում էր, որ վնասված ուղեղի բնականոն գործունեության վերականգնման համար անհրաժեշտ է վիրահատական միջամտություն:
Չնայած գիտնականներին արդեն հաջողվել է հասնել որոշակի հաջողությունների հիշողության կորստի դեմ պայքարում, սակայն գլխուղեղային վնասվածքների դեպքում ամեն ինչ շատ ավելի բարդ է: Բուժման տասնյակ խոստումնալից մեթոդներ չեն անցել կլինիկական փորձարկումներ, գոյություն չունեին հավանության արժանացած բուժման մեթոդներ: Ամեն տարի ԱՄՆ-ում գլխուղեղի վնասվածք է ստանում ավելի քան 3 միլիոն մարդ, միջինը յուրաքանչյուր 21 վայրկյանը մեկ մարդ ստանում է գլխուղեղի վնասվածք: Սովորաբար նմանատիպ վնասվածքները դժբախտ պատահարների, ճանապարհատրանսպորտային պատահարների արդյունք են: Այդ շարքում կարելի է նշել նաև սպորտային վնասվածքները և ռազմական գործողությունների ժամանակ ստացած վնասվածքները: Գլխուղեղի վնասվածքներն այնքան են մտահոգել մասնագետներին, որ նույնիսկ ստիպել են Ամերիկայի զինված ուժերին աշխատանքներ սկսել BLAST համակարգչային ծրագրի վրա, որը կարող է որոշել արդյոք ուղեղը վնասվել է պայթյունից, թե ոչ:
Վերջին փորձարկումների ընթացքում հետազոտողները ներարկել են ISRIB դեղամիջոցը գլխուղեղային վնասվածք ունեցող մկներին` իմանալու համար, արդյոք դա կբարելավի նրանց կարողությունը ջրային լաբիրինթոսից ելք գտնելու համար: Վնասվածք ստացած մկները արագ հասել են առողջ մկներին դեղամիջոցի ընդունումից հետո: Դեղամիջոցի ազդեցությունը շարունակվել է դեռ մեկ շաբաթ: Գիտնականները նշում են, որ դա զարմանալի և խոստումնալից սկիզբ է: Սակայն դեռ բազմաթիվ փորձարկումներ է հարկավոր իրականացնել մինչ դեղամիջոցը կլինիկական փորձարկումներ կանցնի մարդկանց վրա:
