Nuada ստարտափը ներկայացրել է ձեռնոց, որը ձեռքին տալիս է գերկարողություններ
Nuada-ն իրենից ներկայացնում է ձեռնոց, որը ձեռքին ուժ և կոորդինացիա է հաղորդում` ուժեղացնելով մարդու ձեռքի ափի և մատների շարժումը: Ձեռնոցը հագեցած է օժանդակության էլեկտրամեխանիկական համակարգով, որը թույլ է տալիս ցուցաբերել գրեթե գերմարդկային ճարպկություն կամ պարզապես կատարել ամենօրյա առաջադրանքներ: Ձեռնոցը պարունակում է էլեկտրոնային ջիլեր, որոնք օգնում են բացել և փակել ձեռքի ափը, ինչպես նաև իրականացնել հիմնական շարժումները:
Խելացի ձեռնոցը կարող է օգնել նրանց, ովքեր ունեն վնասվածք կամ որևե հիվանդություն: Ինչպես նաև այն օգտակար կլինի ֆիզիկական աշխատանքի ընթացքում: Օգտատերը կկարողանա ձեռքում ավելի երկար պահել իրեր ավելի քիչ մկանային հոգնածությամբ և աշխատել ավելի արագ:
«Մենք օգտագործում ենք մեր կողմից մշակված էլեկտրամեխանիկական համակարգը, որը կօգնի օգտատիրոջն իրականացնել համապատասխան շարժումը»,-ասել է ստարտափի հիմնադիրներից մեկը` Ֆիլիպե Կինաշը: «Ձեռնոցը հնարավորություն է տալիս պահել ահռելի ծանրություն փոքր համակարգի միջոցով, որի աշխատանքի համար անհրաժեշտ է շատ քիչ քանակությամբ էներգիա: Մենք կկարողանանք կառուցել առաջին սերիական էկզոկմախքը մեր տեխնոլոգիայի շնորհիվ»:
Ծրագրի գաղափարը ծնվել է անձնական փորձից:
«Դեռ 2013 թվականին ես կոտրեցի իմ ձեռքը և հասկացա, թե որքան անհարմար է ձեռքի ֆունկցիայի պակասը» ,- ասել է Կինաշը: Այդ ժամանակ ես աշխատում էի խոշոր տեքստիլային ընկերությունում, ինչպես նաև մասնակցում էի համալսարանական հետազոտություններին, ուստի ամեն ինչ հաջող կերպով համընկավ»:
Թիմը սկսել է իր աշխատանքները համալսարանում, սակայն նախագիծը արժանացավ Microsoft Imagine մրցանակին, և նրանք հայտնվեցին Սիեթլում: Թիմն աշխատել է նախագծի վրա մոտավորապես երկու տարի և, վերջապես, պատրաստ է ցուցադրել ձեռնոցը: Դեռ չի հաղորդվում, թե որքան կարժենա ձեռնոցը, սակայն ընկերությունը հուսով է, որ մոտ ապագայում այն կօգնի ձեռքի սահմանափակ շարժումներով մարդկանց:
