Լոնդոնյան Skipping Rocks Lab ստարտափը գտել է շրջակա միջավայրի աղտոտման դեմ պայքարի նոր միջոց` թափանցիկ էկոլոգիապես անվտանգ Ooho պղպջակներ, որոնք կարող են դառնալ պլաստիկ շշերի հիանալի փոխարինող: Ooho-ն իրենից ներկայացնում է անհամ, սակայն ուտելի էկոլոգիապես մաքուր ջրի տարա, որը ոչ մի վտանգ չի ներկայացնում մարդու և բնության համար: Այն ոչ միայն կարելի է ուտել, այլ նաև նետել առանց շրջակա միջավայրի աղտոտման` փաթեթավորումը արագ քայքայվում և անհետանում է:
Նախագիծը մշակվել էր դեռևս 2014 թվականին, սակայն միայն հիմա է այն պատրաստ զանգվածային արտադրության համար: Այդ ժամանակվանից Skipping Rocks Lab թիմը հասցրել է իր գաղափարը դարձնել աշխատանքային նախատիպ և հավաքել է ավելի քան 800 հազար ֆունտ ստերլինգ (ավելի քան մեկ միլիոն դոլար), ինչը երկու անգամ ավելին է, քան նախատեսել էին հավաքել մշակողները:
Ստարտափի ներկայացուցիչները նշում են, որ նորույթը կարող է օգտագործվել ոչ միայն ջրի, այլ նաև այլ ըմպելիքների համար:
Այս նորարարական պղպջակները պատրաստված են ծովային ջրիմուռներից և կալցիումի քլորիդից, որոնք ջրի շուրջ առաջացնում են կրկնակի շերտ:
Ակնկալվում է, որ ջրային պղպջակները վաճառքի կհանվեն մինչև 2017 թվականի ավարտը: Դրանց արժեքը կկազմի մոտավորապես երկու ցենտ:
