Չնայած ժամանակակից Bluetooth-ականջակալներն ավելի կոմպակտ են, քան երբևէ, դրանք ամեն դեպքում պետք է կրել ականջում, ինչն այդքան էլ հարմարավետ չէ: Origami Labs հոնգկոնգյան ստարտափն առաջարկում է վերածել Bluetooth-ականջակալը մատանու, իսկ այնուհետև օգտագործել ոսկրային հաղորդունակությունը մատի ծայրին ձայնը փոխանցելու համար, իսկ այդտեղից էլ ականջին:
Ձայնի փոխանցման համար ոսկրային հաղորդունակության օգտագործման գաղափարը նոր չէ: Այս տեխնոլոգիան լայնորեն կիրառվում է լսողական սարքավորումների շուկայում, քանի որ այն փոխանցում է ձայնն անմիջականորեն ներքին ականջին, այդպիսով շրջանցելով միջին կամ արտաքին ականջի պատճառով առաջացած լսողական խնդիրները: Այս նույն տեխնոլոգիան կիրառվում է անլար ականջակալների համար` առաջին հերթին AfterShokz-ի կողմից ականջակալներում, որոնք թույլ են տալիս վայելել երաժշտություն կամ զանգեր ընդունել` առանց փակելու ականջները:
Համանման տեխնոլոգիա է օգտագործվում նաև Orii մատանու դեպքում: Օգտատերը մատանին կրում է ցուցամատին, իսկ երբ այն թրթռում է` տեղեկացնելով զանգի մասին, ուղղակի բարձրացնում է ձեռքը վերև, մատի ծայրով դիպչում է ականջին և խոսում:
Orii-ն իրենից ներկայացնում է ալյումինե մատանի` միացված փոքր արկղին, որտեղ գտնվում է ողջ էլեկտրոնիկան: Վերջին աշխատող նախատիպի հիմնական մասն ուներ մոտավորապես 30 մմ երկարություն, 20 մմ լայնություն և 12 մմ հաստություն: Կոր դիզայնի շնորհիվ այն ավելի փոքր է երևում:
Այն բավականաչափ տպավորիչ է` հաշվի առնելով, թե ինչ է ներառում` Bluetooth 4.0` քիչ էներգիա պահանջող Bluetooth-ի աջակցությամբ, աղմուկը չեզոքացնող համակարգ, հիրոսկոպ, լուսադիոդ, 50 մԱԺ հզորությամբ մարտկոց, և ամենակարևորը` ոսկրային հաղորդունակության տվիչ, որը տեղակայված է կորպուսի ստորին հատվածում: Հարկ է նշել, որ մարտկոցն ապահովում է մոտավորապես 1,5 ժամ անդադար լսում և ավելի քան 40 ժամ սպասման ռեժիմում: Ինչպես և մնացած վերջին սերնդի Bluetooth-ականջակալները, Orii-ն աշխատում է iPhone Siri-ի և Google Assistant-ի հետ, ինչը նշանակում է, որ օգտատերը կարող է ուղղակի թափահարել ձեռքը, դիպչել մատի ծայրով ականջին և միանգամից սկսել խոսել ձայնային օգնականի հետ:
