R2D2 հեղափոխական վիրաբուժական համակարգը, որը մշակվել է Մեծ Բրիտանիայի Օքսֆորդի համալսարանի կողմից, կարող է իրականացնել բարդ վիրահատություններ ամենահմուտ վիրաբույժից ավելի լավ:
Աչքի ցանցաթաղանթի վիրահատության ժամանակ աչքի մեջ արվում են շատ փոքր անցքեր, որպեսզի հասնեն հենց ցանցաթաղանթին` 10 միկրոն հաստություն ունեցող թաղանթին, որը լույսը վերափոխում է ուղեղի կողմից մշակվող էլեկտրական ազդանշանների: Այնպիսի հիվանդության դեպքում, ինչպիսին է էպիրետինալ մեմբրանը, ցանցաթաղանթի վրա վնասվածքի, որևէ հիվանդության կամ ուղղակի ծերության պատճառով առաջանում է սպի: Վիրահատության իրականացման ժամանակ վիրաբույժն անգամ իր ձեռքի արյան հոսքի պատճառով կարող է անել ոչ ճշգրիտ բացվածք, որը կլինի շատ խորը և դրանով կսրի իրավիճակը:
Օքսֆորդի կողմից մշակված ցանցաթաղանթի վիրահատություններ իրականացնող ռոբոտիզացված սարքը (R2D2) չունի զարկերակ, հետևաբար կարող է 10 անգամ ավելի ճշգրիտ լինել, քան ցանկացած վիրաբույժ: Ընդ որում, շատ կարևոր է, որպեսզի մի քանի միլիմետրանոց շատ փոքր դանակը հասնի հիվանդի ակնախնձորի հատակին: Ողջ գործընթացը դեռ գտնվում է վիրաբույժների անմիջական հսկողության տակ:
R2D2-ի մշակմամբ Օքսֆորդի թիմը զբաղվում է 2011 թվականից և իրականացրել է առաջին էքսպերիմենտալ վիրահատությունն անցած տարվա սեպտեմբերին: Դրանից հետո թիմն իրականացրել է ևս 11 հաջող վիրահատություններ ռանդոմիզացված կլինիկական փորձարկումների ժամանակ, և ռոբոտի աշխատանքի արդյունքները համեմատվել են մարդկանց կողմից իրականացրած վիրահատությունների արդյունքների հետ:
Թիմը կարծում է, որ R2D2-ը հիվանդների համար կարող է անել շատ ավելին: Նրանք ծրագրում են, որ շուտով ռոբոտը հագեցած կլինի ասեղներով` աչքի հետին հատվածում հեղուկ ներարկելու համար:
