Այսօր ցանկանում եմ խոսել WordPress-ի SEO խրվակների մասին, բայց մինչ այդ ծանոթանանք, թե ինչ է SEO-ն իրենից ներկայացնում:
SEO ( search engine optimization) հայերեն կարճ կարելի է անվանել որոնողական առաջխաղացում: Այն որոնողական համակարգերում վեբ-կայքերին բարձր դիրքեր ապահովող տեխնոլոգիա է: Իսկ ինչու՞ է այն կարևոր կայքերի համար: Կայքերի լավ դիրքը որոնողական համակարգերում ապահովում է ավելի շատ այցելուներ: Որոնողների 95%-ը այցելում է որոնողական համակարգերում առաջին 10 դիրքերը զբաղեցնող կայքերը, իսկ 2%-ը հազիվ է հասնում մինչև 4-րդ էջը: Դրա համար կարևոր է ունենալ լավ կազմակերպված SEO:
SEO-ի կազմակերպումն իրենից ներկայացնում է երկարատև գործընթաց, որն ուղեկցվում է վեբ-կայքի բազմաթիվ ներքին և արտաքին աշխատանքներով: Այդ աշխատանքներից է վեբ-կայքի ինֆորմացիայի օպտիմալացումը՝ ներքին և արտաքին մասերով: Ներքին օպտիմալացումն իրենից ներկայացնում է վեբ-կայքի նավիգացիոն, ձևավորման, ինֆորմացիայի պարզության, կառուցվածքի, բանալի բառերի (keywords), էջերի բացատրությունների և այլ բաղադրիչների ստանդարտ և ոչ ստանդարտ լուծումներ, որոնք ընդհանուր առմամբ, ժամանակի ընթացքում բերում են վեբ-կայքի դիրքի բարձրացմանը` որոնողական համակարգերում որոշակի հարցումների համար:
Իսկ հիմա ծանոթանանք մի քանի WordPress SEO խրվակների հետ:
Yoast SEO
WordPress-ի լավագույն անվճար խրվակներից մեկն է: Այն որոնման համակարգի օպտիմալացման շատ խնդիրներ է լուծում և այդ ամենն ամբողջովին անվճար:
Yoast-ը հնարավորություն է տալիս նոր օգտվողին պարզ ձևով ծանոթանալ դրա աշխատանքի հետ: Դրա համար տեղադրելուց հետո այն օգտագործողին տալիս է շրջագայելու հնարավորություն, որի ընթացքում ցույց է տալիս խրվակի կարևոր ընտրացանկերը և բացատրում խրվակի յուրահատուկ հնարավորությունները:
Ակտիվացնելուց հետո պետք է կատարել մի քանի կարգավորումներ, որից հետո SEO by Yoast-ը կսկսի իսկապես օգտակար լինել: Այն ավտոմատ գեներացնում է գրառումների SEO նկարագրությունը (Description) և հիմնաբառերը (Keywords), սակայն անհրաժետ է գրել նաև կենտրոնացնող հիմնաբառը (Focus Keyword), առանց որի անիմաստ կլինեն առաջին երկուսը:
Այն հնարավորություն է տալիս նաև ստեղծել կայքի XML քարտեզ, որը արագացնում և բարելավում է կայքի ինդեքսավորումը: Սակայն այն միանգամից ստեղծում է մի քանի XML քարտեզներ (կարգերի, էջերի, պիտակների և այլն), և վերջում կունենաք քարտեզերի մի ամբողջ հավաքածու, որոնք անհամեմատ ավելի լավ են աշխատում, քան Google XML Sitemap-ը:
SEO by Yoast-ը ապահովում է ՝
- Էջի վերլուծություն
- Meta տարրեր
- RSS օպտիմալացում
- Սոցցանցերի ինտեգրացիա
- Բազմակայք (Multi-Site) համատեղելիություն
- «Հացի փշուրներ» (Breadcrumbs):
Այն ունի 1 միլիոնից ավել ակտիվ տեղակայում:
SEO by Yoast-ը կարող եք ներբեռնել WordPress-ի պաշտոնական կայքից:
All in One SEO Pack
All in One SEO Pack-ը արդեն երկար ժամանակ է ինչ գոյություն ունի և հայտնի ու սիրված WordPress խրվակ է: Այն ունի ավելի քիչ հնարավորություններ քան Yoast SEO-ն, բայց դա չի նշանակում, որ պակաս հզոր է:
All in One SEO Pack-ն ունի շատ պարզ կարգավորումների ընտրացանկ, որը հնարավորություն է տալիս քիչ ժամանակ հատկացնել խրվակը կարգավորելու վրա: Այն ակտիվացնելուց հետո սկսում է միանգամից աշխատել և ավտոմատ կերպով ստեղծում է գրառումների SEO նկարագրությունը և հիմնաբառերը: Կարող եք նաև ինքներդ կարգավորել այդ ամենը, բայց, եթե ունեք 1000-ից ավել գրառումներ, ապա պատկերացրեք, թե որքան ժամանակ պետք է հատկացնեք յուրաքանչյուր գրառման կարգավորումներն անելու համար:
Այն նաև հնարավորություն է տալիս կարգավորել կայքի գլխավոր էջը, որը կարելի է համարել կայքի սիրտը: Որքան լավ կարգավորեք այդ էջը, այդքան ավելի արդյունավետ կլինի որոնողական ինդեքսավորումը:
Ինտեգրվում է նաև Facebook և Twitter սոցիալական ցանցերի հետ: Դրա կարգավորումներն անելուց հետո բացելով որևէ գրառում կամ էջ, ներքևում կտեսնեք ավելացաված նոր դաշտ, որտեղ կարող եք կարգավորել հրապարակումը սոցիալական ցանցերում:
Այս խրվակը ապահովում է ՝
- Կայքերի XML քարտեզների աջակցություն
- Google Analytics աջակցություն
- Ընդլայնված URL- ներ
- Համատեղելիություն այլ խրվակների հետ:
Այն նույնպես ունի 1 միլիոնից ավել ակտիվ տեղակայում և կարող եք ներբեռնել WordPress-ի պաշտոնական կայքից:
SEO Ultimate
SEO Ultimate-ը նույնպես շատ ֆունկցիոնալ և հզոր խրվակ է: Այս խրվակում գործառույթները ներկայացված են խմբերով, որոնք կոչվում են մոդուլներ(20-ից ավել), և դուք կարող եք ցանկացած ժամանակ միացնել կամ անջատել մոդուլները: Բոլոր մոդուլները գտնվում են խրվակի Modules ընտրացանկի մեջ: Այդ էջում գտնվում են բոլոր մոդուլների հղումները և յուրաքանչյուրի վրա սեղմելով կարող եք անցնել դրա կարգավորման էջ: Յուրաքանչյուր մոդուլ կարող է աշխատել 4 ռեժիմներից մեկով, դրանք են ՝ ակտիվ(enabled), լուռ(silenced), թաքնված(hidden), անջատված(disabled): Թաքնված ռեժիմի ժամանակ մոդուլն աշխատում է, բայց չի երևում կառավարակետում, իսկ լուռ ռեժիմում մոդուլն աշխատում է առանց ծանուցումների:
SEO Ultimate-ը շատ հարմար հնարավորություն է տալիս էջերին, գրառումներին և կարգերին նկարագրություն և հիմնաբառ ավելացնել: Դրա համար նախատեսված են Meta Description և Meta Keywords մոդուլները: Դրանց հարմարությունը կայանում է նրանում, որ բոլոր էջերի, գրառումների և կարգերի անունները ցուցադրվում են մի էջում՝ հերթականությամբ, իսկ դրանց դիմաց կարող եք գրել յուրաքանչյուրի նկարագրությունը (Meta Description մոդուլում) և հիմնաբառը (Meta Keywords մոդուլում), ի տարբերություն այլ խրվակների, որտեղ պետք է հերթով բացել յուրաքանչյուր էջը, գրառումը կամ կարգը և ավելացնել նկարագրություն ու հիմնաբառ:
Շատ հարմար հնարավորություն է տալիս նաև Deeplink Juggernaut մոդուլը: Դրա կարգավորումների էջում ավելացնում ենք բառը և դրանց դիմաց գրում այն հղումը, որը ցանկանում ենք որ կապված լինի բառի հետ: Իսկ գրառումներում և էջերում, որտեղ գրեք այդտեղ ավելցրած բառերը, դրանք միանգամից կլինեն հղումներ դեպի նշված կայքերը:
SEO Ultimate-ն ապահովում է ՝
- Meta նկարագրության խմբագիր
- Դիմակ հղումների գեներատոր
- Meta Robot խմբագիր
- 404 մոնիտոր
Այն ունի 200 000-ից ավել ակտիվ տեղակայում և կարող եք ներբեռնել WordPress-ի պաշտոնական կայքից:
Յուրաքանչյուր խրվակ ունի իր առավելություններն ու թերությունները, և կախված պահանջից կարող եք ընտրել Ձեզ համար ամենաօգտակարը:
Շնորհակալություն մեր բլոգից օգտվելու համար։
