Տարբեր դիմակներով և անիմացիաներով ֆիլտրեր՝ շուտով նաև ֆեյսբուքում։
Վերջին մի քանի օրերին ֆեյսբուք սոցիալական կայքը փորձարկում է 
դեռահասների և երիտասարդների կողմից շատ սիրված Snapchat-ին նմանվող տարբեր ֆիլտրեր։ Այս առանձնահատկությունը, որը ներմուծվելու է սոց․կայք, ներառում է կենդանիների պատկերով մի շարք «դիմակներ», որոնք օգտագործվում են Snapchat-ում։ Բացի վերը նշված դիմակներից, այստեղ ընդգրկված են նաև այլ պատկերներ, որոնք կարող եք ավելացնել Ձեր նախընտրած լուսանկարին, ինչպես, օրինակ՝ սրտիկներ, փուչիկներ և այլն։ Այս նոր առանձնահատկության շնորհիվ կարող եք Ձեզ զգալ այնպիսի հայտնի նկարչի դարաշրջանում, ինչպիսին է, օրինակ՝ Վինսենթ Վան Գոգը։
Ֆեյսբուքյան նոր ֆունկցիաներից մյուսը, որը կոչվում է Direct, հնարավորություն է տալիս տեղադրել նկար կամ վիդեո Ձեր կողմից ընտրված ընկերների կամ ընկերական խմբի համար։ Հենց որ դադարեք մեկնաբանել տվյալ նկարը կամ վիդեոն, այն կանհետանա ֆեյսբուքյան Ձեր էջից։
Վերոնշյալ փորձարկումներն առայժմ միայն Իռլանդիայում են կատարվել։
Ֆեյցբուք սոցիալական կայքն առաջին անգամ է կրկնօրինակում նմանօրինակ ֆունկցիա, ինչն ամենևին չի անհանգստացնում կայքը ստեղծողներին։ Այս նոր ֆունկցիայի միջոցով ուղարկված նամակները տեղադրված կլինեն ֆեյսբուքի սովորական նամակագրությունից անջատ։
Այս նոր ֆունկցիայի իրագործումը, թերևս հնարավոր դարձավ մարտ ամսին կայքի ձեռք բերած MSQRD startup-ի շնորհիվ։
Մի քանի օր առաջ Halloween-ի առթիվ սոց․կայքը ներկայացրել է նոր ֆիլտրեր՝ Halloween-յան ոճով վիդեոների համար։ Ընկերության փոխանցմամբ՝ այս դիմակները հասանելի կլինեն Ֆեյսբուքում անգամ Halloween-ից հետո։
