Ավիաընկերությունների երկարատև թռիչքները մոտ ապագայում կարող են մնալ անցյալում նախաձեռնող ստարտափների շնորհիվ, ինչպիսին է օրինակ Spike-ը:
Շուտով հնարավոր կլինի Լոնդոնից մինչև Նյու-Յորք ճանապարհորդել ընդամենը երեք ժամվա ընթացքում գերձայնային ուղևորատար ինքնաթիռով, որը կարող է զարգացնել ժամում մինչև 2100 կմ արագություն:
Spike Aerospace S-512 նախատիպը բոլորովին վերջերս է ավարտել իր առաջին անօդաչու փորձնական թռիչքը, իսկ կոմերցիոն տարբերակները հասանելի կլինեն արդեն 2021 թվականին:
Ընկերությունը հաղորդել է, որ առաջին թռիչքը բավականին հաջող է անցել: «SX-1.2 փորձնական թռիչքներն իրականացվել են իրական պայմաններում և տրամադրել են ավելի շատ տվյալներ, քան աէրոդինամիկ խողովակի փորձարկումները` իրականացված արհեստական միջավայրում:
Spike ընկերությունը չի ներկայացրել փորձնական թռիչքների և ոչ մի լուսանկար կամ տեսանյութ, սակայն հաղորդել է, որ իրականացվել է յոթ կարճ թռիչք ընդհանուր դիզայնի և ինքնաթիռի թռիչքի կառավարման ստուգման համար: Փորձարկումները կատարվել են Նոր Անգլիայում գտնվող մասնավոր օդանավակայանում:
S-512 Quiet Supersonic Jet-ը տեղավորում է 18-22 ուղևոր 10 հազար կիլոմետր հեռավորություն անցնելու դեպքում: «Նոր մոդելն ապահովում է բարձր աէրոդինամիկ արդյունավետություն և բարելավված թռիչքային բնութագրեր ինչպես ցածր արագությամբ թռիչքի, այնպես էլ գերձայնային թռիչքի ժամանակ»,-ասել է ավագ ինժեներ դոկտոր Անատոշ Մոյտրան: «Բարձր դիմացկունություն ունեցող ճակատային եզրը նվազեցնում է ալիքային դիմադրությունը և, հետևաբար, նվազեցնում է վառելիքի սպառումը և ավելացնում հեռավորությունը»:
Ինքնաթիռը չունի հորիզոնական պոչաթևեր, ինչը նվազեցնում է թռիչքի ժամանակ դիմադրությունը և ինքնաթիռի քաշը: Ինքնաթիռում բացակայում են պատուհանները. ուղևորները կկարողանան դիտել կենդանի տեսանյութ խցիկի պատերում ներկառուցված բարակ էկրանների միջոցով` պանորամային պատկեր ստեղծելու համար: Յուրաքանչյուր ինքնաթիռը կարժենա մոտավորապես 60-80 միլիոն դոլար:
2003 թվականին դադարեցվել էին Concorde գերձայնային ինքնաթիռների թռիչքները անվտանգության բազմաթիվ խնդիրների և 2000 թվականին Փարիզում տեղի ունեցած աղետի պատճառով, որը 109 մարդու կյանք խլեց:
Սակայն այժմ որոշ ընկերություններ մշակում են գերձայնային ուղևորատար տրանսպորտային միջոցներ: NASA-ն համագործակցում է Lockheed-Martin-ի հետ` աշխատելով X-plane ռեակտիվ ինքնաթիռի վրա: Իլոն Մասկը ցանկանում է մարդկանց ուղարկել տիեզերք և տեղակայել նրանց երկրագնդի մյուս կողմում ընդամենը մեկ ժամվա ընթացքում:
