Stanley Robotics ֆրանսիական ստարտափն ավելի քան 4 միլիոն դոլարի ներդրում է ստացել Elaia Partners, Bpifrance և Idinvest Partners ընկերությունների կողմից: Ընկերությունը մշակում է ռոբոտներ, որոնք կկարողանան ավտոկայանատեղիի մուտքի մոտ հաճախորդի մեքենան վերցնել և կայանել այն:
Ուղևորները գիտեն, թե որքան թանկ պետք է վճարեն իրենց մեքենան մեկ շաբաթով օդանավակայանում թողնելու համար: Վճարովի ավտոկայանատեղիները դարձել են օդանավակայանների սեփականատերերի համար ամենաշահութաբեր բիզնեսներից մեկը:
Stanley Robotics-ը մտադիր է փոխել իրավիճակը Stan անունով ռոբոտի շնորհիվ: Ընկերությունը ծրագրում է օդանավակայանների ավտոկայանումը դարձնել ավելի արդյունավետ: Սովորաբար ուղևորները շատ ժամանակ են ծախսում մեքենան կայանելու համար:
Այս ռոբոտը խնայում է ուղևորների ժամանակը, ինչպես նաև ավելի խնայողաբար է օգտագործում մեքենաները կայանելու տարածքը: Եվ նույնիսկ, եթե Դուք վերադառնում եք տուն, համակարգը տեղեկանում է Ձեր երթուղու մասին և մեքենան վերադարձնում է մինչ ինքնաթիռի վայրէջք կատարելը:
Իսկ եթե ինչ-որ մեկը մեկնում է երկար ժամանակով, ռոբոտը գիտի, որ կարող է կայանել մեքենան այնպիսի վայրում, որպեսզի ապահովի լրացուցիչ տարածք մնացած մեքենաների համար:
Stan ռոբոտն աշխատում է բոլոր տեսակի ավտոմեքենաների հետ: Նրան անհրաժեշտ չէ մեքենայի բանալին` բջջային հարթակը ֆիքսում է անիվները և բարձրացնում է ողջ մեքենան տեղափոխման համար: Հասցնելով մեքենան կայանման համար նախատեսված վայրը, Stan-ը բաց է թողնում այն և դնում գետնին: Stanley Robotics տեխնոլոգիան արդեն կիրառվում է Փարիզի Շառլ դը Գոլ օդանավակայանում:
Ավտոկայանատեղիները հանդիսանում են եկամտի զգալի աղբյուր, այդ պատճառով ընկերությունները պատրաստ են ներդրումներ կատարել: Ֆինանսավորման հերթական փուլի ավարտից հետո, այս ստարտափը նախատեսում է նոր պայմանագրեր ստորագրել մի շարք միջազգային օդանավակայանների հետ:
Stanley Robotics-ի հետ համագործակցությունն ավելի շահավետ է, քան նոր կայանատեղերի կառուցումը: Իհարկե, օդանավակայաններում կշարունակեն կառուցել նոր ավտոկայանատեղեր, սակայն Stanley Robotics ընկերության առաջարկը հանդիսանում է հիանալի և հարմարավետ լրացում:
