Մեքենա վարելը կարող է սթրեսի պատճառ հանդիսանալ, այդ պատճառով զարմանալի չէ, որ ճանապարհատրանսպորտային պատահարների մի մասը վարորդների առողջական վիճակի հանկարծակի վատթարացման արդյունք է: Սրտի կաթվածը ղեկին վտանգավոր է ոչ միայն վարորդի համար, այլ նաև նրանց համար, ովքեր գտնվում են մոտակայքում:
Այդ պատճառով, Toyota ընկերությունը մտադիր է իր մեքենաների մեջ ներառել այնպիսի տեխնոլոգիաներ, որոնք կարող են կանխատեսել այդպիսի իրադարձությունը և արագ ու անվտանգ կանգնեցնել մեքենան:
Համակարգը մշակելու համար Toyota ընկերությունը համագործակցում է Միչիգանի բժշկական կենտրոնի հետ:
Մասնագետները նշում են. «Քանի որ բժշկական հաստատությունները շարունակում են զարգանալ, մեծահասակ վարորդների թիվը շարունակում է աճել, ինչը կարող է հանգեցնել առողջական խնդիրների պատճառով պատահարների թվի ավելացմանը»:
Մշակողների թիմն ասել է, որ խնդրի լուծումը ներառում է հատուկ տվիչների տեղադրում ամրագոտիներում և ղեկի վրա: Դրանք հավաքելու են տվյալներ, որոնք կփոխանցվեն համակարգի միջոցով` օգտագործելով հատուկ ալգորիթմներ: Հիմնական խնդիրներից մեկն է մշակել արդյունավետ ալգորիթմ, որը կկարողանա կատարել ճշգրիտ կանխատեսումներ սրտի աշխատանքի վերաբերյալ: Ընկերությունը նշել է նաև` «Մեր խնդիրն է ստեղծել համակարգ, որը ոչ միայն կկարողանա նկատել սրտի ռիթմի չնչին փոփոխությունները, այլ նաև կկարողանա տարբերակել աղմուկը և շարժումը, որոնք տեղի են ունենում մեքենայի ներսում»: Ընդ որում ավտոարտադրողը նշում է, որ մոնիթորինգի համակարգը չպետք է էլեկտրոնային անսարքություններ ունենա, սակայն այդ ամենը մեծ աշխատանքներ է պահանջում:
Նմանատիպ համակարգը կօգնի կանխարգելել վնասվածքների և մահվան դեպքերը, երբ վարորդը կորցնում է մեքենայի վերահսկողությունը:
